Seven Sorrows of the Blessed Virgin Mary

Septem Dolorum Beatæ Mariæ Virginis

Class II · White vestments · Next:

Latin propers of the 1962 Roman Missal. English is given for the readings only (Douay-Rheims); see why.

IntroitusIntroit

Joann 19:25

Stabant juxta Crucem Jesu Mater ejus, et soror Matris ejus, María Cléophæ, et Salóme et María Magdaléne.

Joann 19:26-27.

Múlier, ecce fílius tuus: dixit Jesus; ad discípulum autem: Ecce Mater tua.

Glória Patri…

Stabant juxta Crucem Jesu Mater ejus, et soror Matris ejus, María Cléophæ, et Salóme et María Magdaléne.

OratioCollect

Deus, in cujus passióne, secúndum Simeónis prophetíam, dulcíssimam ánimam gloriósæ Vírginis et Matris Maríæ dolóris gladius pertransívit: concéde propítius; ut, qui transfixiónem ejus et passiónem venerándo recólimus, gloriósis méritis et précibus ómnium Sanctórum Cruci fidéliter astántium intercedéntibus, passiónis tuæ efféctum felícem consequámur:

Qui vivis…

LectioEpistle

Léctio libri Judith.

Judith 13:22, 23-25

Benedíxit te Dóminus in virtúte sua, quia per te ad níhilum redégit inimícos nostros. Benedícta es tu, fília, a Dómino, Deo excélso, præ ómnibus muliéribus super terram. Benedíctus Dóminus, qui creávit cœlum et terram: quia hódie nomen tuum ita magnificávit, ut non recédat laus tua de ore hóminum, qui mémores fúerint virtútis Dómini in ætérnum, pro quibus non pepercísti ánimæ tuæ propter angústias et tribulatiónem géneris tui, sed subvenísti ruínæ ante conspéctum Dei nostri.

Judith 13:22, 23-25 · Douay-Rheims

And they all adored the Lord, and said to her: The Lord hath blessed thee by his power, because by thee he hath brought our enemies to nought. And Ozias the prince of the people of Israel, said to her: Blessed art thou, O daughter, by the Lord the most high God, above all women upon the earth. Blessed be the Lord who made heaven and earth, who hath directed thee to the cutting off the head of the prince of our enemies. Because he hath so magnified thy name this day, that thy praise shall not depart out of the mouth of men who shall be mindful of the power of the Lord for ever, for that thou hast not spared thy life, by reason of the distress and tribulation of thy people, but hast prevented our ruin in the presence of our God.

GradualeGradual

Dolorósa et lacrimábilis es, Virgo María, stans juxta Crucem Dómini Jesu, Fílii tui, Redemptóris.

℣. Virgo Dei Génetrix, quem totus non capift orbis, hoc crucis fert supplícium, auctor vitæ factus homo. Allelúja, allelúja.

℣. Stabat sancta María, cœli Regína et mundi Dómina, juxta Crucem Dómini nostri Jesu Christi dolorósa.

SequentiaSequence

Stabat Mater dolorósa

Juxta Crucem lacrimósa,

Dum pendébat Fílius.

Cujus ánimam geméntem,

Contristátam et doléntem

Pertransívit gládius.

O quam tristis et afflícta

Fuit illa benedícta

Mater Unigéniti!

Quæ mærébat et dolébat,

Pia Mater, dum vidébat

Nati pœnas íncliti.

Quis est homo, qui non fleret,

Matrem Christi si vidéret

In tanto supplício?

Quis non posset contristári,

Christi Matrem contemplári

Doléntem cum Fílio?

Pro peccátis suæ gentis

Vidit Jesum in torméntis

Et flagéllis súbditum.

Vidit suum dulcem

Natum Moriéndo desolátum,

Dum emísit spíritum.

Eja, Mater, fons amóris,

Me sentíre vim dolóris

Fac, ut tecum lúgeam.

Fac, ut árdeat cor meum

In amándo Christum Deum,

Ut sibi compláceam.

Sancta Mater, istud agas,

Crucifixi fige plagas

Cordi meo válide.

Tui Nati vulneráti,

Tam dignáti pro me pati,

Pœnas mecum dívide.

Fac me tecum pie flere,

Crucifíxo condolére,

Donec ego víxero.

Juxta Crucem tecum stare

Et me tibi sociáre

In planctu desídero.

Virgo vírginum præclára.

Mihi jam non sis amára:

Fac me tecum plángere.

Fac, ut portem Christi mortem,

Passiónis fac consórtem

Et plagas recólere.

Fac me plagis vulnerári,

Fac me Cruce inebriári

Et cruóre Fílii.

Flammis ne urar succénsus,

Per te, Virgo, sim defénsus

In die judícii.

Christe, cum sit hinc exíre.

Da per Matrem me veníre

Ad palmam victóriæ.

Quando corpus moriétur,

Fac, ut ánimæ donétur

Paradísi glória.

Amen. Allelúja.

EvangeliumGospel

Sequéntia ☩ sancti Evangélii secúndum Joánnem.

Joann 19:25-27

In illo témpore: Stabant juxta Crucem Jesu Mater ejus, et soror Matris ejus, María Cléophæ, et María Magdaléne. Cum vidísset ergo Jesus Matrem, et discípulum stantem, quem diligébat, dicit Matri suæ: Múlier, ecce fílius tuus. Deinde dicit discípulo: Ecce Mater tua. Et ex illa hora accépit eam discípulus in sua.

John 19:25-27 · Douay-Rheims

Now there stood by the cross of Jesus, his mother and his mother’s sister, Mary of Cleophas, and Mary Magdalen. When Jesus therefore had seen his mother and the disciple standing whom he loved, he saith to his mother: Woman, behold thy son. After that, he saith to the disciple: Behold thy mother. And from that hour, the disciple took her to his own.

OffertoriumOffertory

Jer 18:20

Recordáre, Virgo Mater, in conspéctu Dei, ut loquáris pro nobis bona, et ut avértat indignatiónem suam a nobis.

SecretaSecret

Offérimus tibi preces et hóstias, Dómine Jesu Christe, humíliter supplicántes: ut, qui Transfixiónem dulcíssimi spíritus beátæ Maríæ, Matris tuæ, précibus recensémus; suo suorúmque sub Cruce Sanctórum consórtium multiplicáto piíssimo intervéntu, méritis mortis tuæ, méritum cum beátis habeámus:

Qui vivis…

PrefatioPreface

de Beata Maria Virgine

Vere dignum et justum est, æquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: Et te in Transfixióne beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et, virginitátis glória permanénte, lumen ætérnum mundo effúdit, Jesum Christum, Dóminum nostrum. Per quem majestátem tuam laudant Angeli, adórant Dominatiónes, tremunt Potestátes. Cæli cælorúmque Virtútes ac beáta Séraphim sócia exsultatióne concélebrant. Cum quibus et nostras voces ut admítti jubeas, deprecámur, súpplici confessióne dicéntes:

CommunioCommunion

Felices sensus beátæ Maríæ Vírginis, qui sine morte meruérunt martýrii palmam sub Cruce Dómini.

PostcommunioPostcommunion

Sacrifícia, quæ súmpsimus, Dómine Jesu Christe, Transfixiónem Matris tuæ et Vírginis devóte celebrántes: nobis ímpetrent apud cleméntiam tuam omnis boni salutáris efféctum:

Qui vivis…

When this Mass is said

2026

2027

2028

2029

2031